Yeah We did It

စနေနေ့ ပွဲစဉ်များ ကစားအပြီးမှာ United အနေဖြင့် အဆင့် ၄ နေရာသို့ ယာယီတက်လှမ်း ထားနိုင်ခဲ့ပြီ ဖြစ်၏။ တခြား အသင်းတွေ ကစားပြီးသွားရင်တော့ အဆင့် ရပ်တည်မှုက အပြောင်းအလဲ ရှိလာနိုင်၏။ မည်သို့ပင် ဆိုစေ နည်းပြ Amorim လက်ထက်မှာ EPL ၃ ပွဲဆက် နိုင်သည့် ရလဒ်လေး ရခဲ့ပြီ။ ၃ ဆက်ပွဲမှသည် နောက်ထပ်လည်း နိုင်ပွဲတွေ ဆက်ဖို့ မျှော်လင့်မိပါ၏။

အိမ်ကွင်းပေမယ့် Brighton နဲ့တွေ့ရင် ရုန်းကန်နေရလေ့ ရှိသည့် United တို့ ဒီတကြိမ်မှာတော့ Brighton ကို အကောင်းဆုံး တုန့်ပြန် ကစားသွားခဲ့၏။ ဦးဆောင်ဂိုးတွေလည်း သွင်းယူနိုင်ခဲ့၏။ ၃ ဂိုးတိတိ သွင်းထားပြီးမှ Brighton က ၂ ဂိုး ပြန်လိုက်သွင်းလို့ ရင်ခုန် သွားရသေး၏။ နာကျင် အချိန်ပိုမှာ Mbeumo က တဂိုး ထပ်မံ သွင်းယူပြီး ၄-၂ ဖြင့် အနိုင်ရလဒ် ရယူသွားခဲ့၏။

နိုင်ပွဲတွေက အသင်းအတွက် အတော်လေး အားဖြစ်စေ၏။ အားနည်းချက်၊ အလွဲ အမှားလေးတွေ ရှိနေသေးပေမယ့် တပွဲထက် တပွဲ ပိုကောင်းလာတာတော့ အမှန်ပင်။ ဒီပုံစံ ခြေစွမ်းကို ထိန်းထားပြီး နိုင်ပွဲတွေ ဆက်လက်ရယူလိုက်ကြရအောင်။

တခြားအသင်းကြီးတွေ အဆင်ပြေနေချိန် United က တလွဲတွေ ဖြစ်၊ ဟော ခု United အဆင်ပြေတော့ အခြားအသင်းတွေ တလွဲတွေ ဖြစ်ကုန်ရော။ Chelsea က Sunderland ကို အိမ်ကွင်းမှာ 1-2 နဲ့ ရှူံးတယ်။ Liverpool က Brentford ကို အဝေးကွင်းမှာ 3-2 နဲ့ ရှုံးနိမ့်သွားခဲ့ရလေ၏။

ထပ်ဆောင်းအချိန်ပို 6 မိနစ် အတွင်း 90+3 မိနစ်မှာ Sunderland တို့ အနိုင်ဂိုး ရသွားခဲ့ခြင်း ဖြစ်၏။ အဆိုပါ နိုင်ပွဲကြောင့် Sunderland အနေဖြင့် အဆင့် 2 နေရာမှာ ရပ်တည်နေခဒ့၏။ Brentford vs Liverpool တို့၏ ပွဲစဉ်ကတော့ အတော်လေး ကြည့်ကောင်းခဲ့၏။ ရှုံးပွဲဆက်နေမှုကို UCL နိုင်ပွဲနဲ့ ရပ်တန့်ပစ်ပြီဟု ထင်မှတ်ခဲ့ပေမယ့် Brentford အိမ်ကွင်းမှာ Liverpool တို့ အနိုင်မယူနိုင်ခဲ့ပေ။

ပွဲစပြီး 5 မိနစ်မှာ ကတည်းက Brentford တို့ ဦးဆောင်ဂိုး စတင် ရရှိသွားခဲ့၏။ EPL Round 6 မှာတုန်းကလည်း အိမ်ကွင်းမှာပဲ United ကို 3-1 ဖြင့် သူတို့ အနိုင်ကစားသွားခဲ့၏။ Mbeumo ထွက်ခွာသွားပေမယ့် အသင်း၏ ပုံစံ မပျက်သွားအောင် သူတို့ တည်ဆောက်ထားနိုင်ခဲ့ကြ၏။

ကဲ ဒီနေ့ Super Sunday မှာ ကျန်တွေ ပွဲတွေ ဆက်ကြည့်လိုက်ရအောင်။

(photos from Premier League Page)